Sangka babaye sa China ro nag-resign sa anang ginatrabahuhan it limang dag-on bangud nga owa nagtambong sa anang kasae ro kaabuan sa mga kaopisina.
Gina-istoryahan it mga Chinese netizens kan-o eamang ro social media post it sangka office worker sa China.
Mabasa sa Weibo post it owa ginpangaeanan nga babaye nga nagareklamo imaw matapos nga mahuy-an sa anang kaugalingon nga kasae bangud nga sa 70 nga kaopisina nga anang gin-imbitahan hay sambilog eamang ro nagtambong.
Suno pa sa babaye nga maeain ro anang buot bangud nga sa tanan nga mga nagpakasae sa andang opisina, nag attend imaw bilang respeto sa pag-imbita kana.
Naugot man imaw bangud nga nagpadugang pa it table sa reception it anang kasae agud nga i-accommodate ro tanan nana nga kaopisina apang ro nag attend eamang hay ro anang apprentice.
Bangud nga napahuya imaw sa pamilya it anang groom, nagdesisyon ro babaye nga magtau it resignation letter pagkatapos it anang wedding day.
Suno kana nga indi nana masarangan nga makatrabaho pa ro mga tawong nagtau kana it kahuy-anan sa adlaw it anang kasae.
Naging viral sa China ro nasambit nga istoya ag tunga ro opinyon it mga netizens angot kara.
Ro iba hay nagpabor nga dapat hay mag-resign eon lang imaw sa trabaho ag ro pila man hay ginbatikos ro babaye bangud nga masyado nana nga ginpataasan ro expectation sa anang mga kaopisina maskin nga bukon man nana ro mga raya it igbata agud nga pahauman ro pag attend sa anang kasae.
