KALIBO, Aklan—Kasunod it napabalita nga pagtaas it kaso it dengue sa nasyon, ginamadali it pilang health expert ro pag-apruba it Philippine Food and Drug Administration ukon FDA nga makaangkon it lisensya ro second-generation dengue vaccine.
Sa interview it bombo radyo, ginpahayag ni Dr. Ian Philip Padilla, professor it microbiology ag sangka health expert nga ro bag-ong bakuna hay ro QDENGA vaccine it Takeda Pharmaceuticals nga nakabase sa Japan nga nag-apply eon para sa certificate of product registration halin sa FDA ko nagtaliwan nga dag-on.
Nagapanawagan suno kana ro pilang grupo it mga doktor sa FDA nga aprubahan eon ro lisensyang QDENGA, bangud nga ro Pilipinas hay naulihi eon sa mga kaiping nga nasyon pag abot sa pagbakuna kontra sa impeksyon sa virus.
Madumduman nga ko 2017 hay naging kontrobersyal ro Dengvaxia dengue vaccine matapos nga gin-anunsyo it manufacturer nga Sanofi Pasteur nga ro bakuna hay pwedeng magtuga it “severe” symptoms para sa mga owa pa na-infect it dengue antes nga mabakunahan.
Sa makaron suno kay Dr. Padilla nga owa pa it partikular nga pagbueong para sa dengue.
Ro pinakamayad sigon nga pamaagi agud nga malikawan ro impeksyon hay likawan nga indi masugod it namok eabi eon sa adlaw .
Dapat man suno kana nga maglimpyo sa palibot ag pirmeng mag inom it tubi kon gina eagnat.
Agud nga makapangaman, dapat nga insigidang magpa-doktor kon makabatyag it mga sintomas it sakit.
