KALIBO, Aklan—Nag-abot eon ro kahalitan sa agricultural sector it probinsiya it Aklan sa kapin sa P15 milyon bangud kay Severe Tropical Storm Kristine.
Raya ro ginpahayag ni Engr. Alexis Apolonio, head it Office of the Provincial Agriculturist ukon OPA-Aklan.
Sandig raya sa initial assessment it taeatapan as of 1:00 pm it Oct. 25.
Ro datos hay ginpaguwa it Provincial Disaster Risk Reduction and Management Council ukon PDRRMC.
Posible suno kana nga makasumite eon makaron nga adlaw ro tanan nga mga banwa it andang damage assessment report, kun sa siin, ginaeauman nga magabag-o man ro kantidad it kahalitan.
Ginpasiguro man it taeatapan nga sa oras nga matapos ro report hay masayuran kara ro numero it mga mangunguma ag pilang ektarya it agricultural areas ro naapektuhan.
Gindugang pa it opisyal nga haeos 50 porsyento pa eamang it paeay ro na-harvest makaron nga season rason nga ginaeauman nga mabahoe ro production loss .
Mag-eowas kara, ginatumod kon may mga tinuea-an ag iba pang pananum kamana man kasapatan ro nahalitan.
Ap-at pang banwa ro owa naka submit it report nga makabig nga rice producing municipalities .
Sa pihak nga parte, ro final report hay igasumite sa Department of Agriculture agud nga matumod kon anong serbisyo ukon bulig nga igatau sa probinsiya .
Nagasalig eon lang sigon sanda makaron sa ayuda halin sa national government bangud nga haeos ubos eon ro pondo it provincial government kasunod it pagpaidaeum sa Aklan sa state of calamity tuga it El Niño phenomenon.
Ro budget nga naka schedule sigon makaron it andang taeatapan hay para eon sa 2025
