KALIBO, Aklan — Nabo-oe it mga magnanakaw ro masobra sa tunga sa milyong pisos nga haega it mga kwarta ag alahas it sangka bakasyunista matapos nga gin sueod ro gina estaran nga apartment kara sa Sitio Angol, Barangay Manocmanoc, Boracay.
Gin kilaea ro biktimang si Crisanta Moyo-Pedersen, 46, residente it Barangay Colong-colong, Ibajay, Aklan ag naga bakasyon eamang sa isla.
Base sa report it Boracay Tourist Assistance Center (BTAC), bandang alas-8:30 it agahon kat mapan-uhan it biktima nga naduea ro anang bag sa sueod it gina upahang kwarto.
Madasig sigon nga nakasueod ro mga suspek bangud samad ro doorknob sa likod nga porsyon it apartment mag eowas pa nga tueog ro nagabantay nga gwardiya.
Kaeakip sa nabo-oe ro P300,000 nga kwarta, 780 Singaporian dollar, maeahaeong cellphone ag magkaeain-eain nga mga alahas.
Sa follow-up operation, naaresto ro sambilog sa mga suspek nga si Recto Ritos, 30, sangka habal-habal driver it Barangay Laserna, Nabas.
Nakilaea ro mga raya pinaagi sa CCTV footage.
Narekober sa anang boarding house ro haeos P70,000 nga kwarta ag cellphone samtang ro kasabwat karang si Miguel Gonzales hay naga pabilin nga at large.
Pila sa mga nadueang alahas ro gin balik sa police station it ina ni Gonzales.
Naga padayun pa ro imbestigasyon it mga pulis sa nasambitang insidente.
