KALIBO, Aklan–Napilitan eon ro pilang pumueoyo sa Scotland nga mag-uba it eambong ukon magsuksok it swimsuit samtang una sa guwa it panimaeay bangud sa sobrang kainit it tyempo.
Suno kay Bombo International Correspondent Nikki Rebustes nga naga-abot sa 25 hasta 31 degrees celsius ro andang temperatura sa Scotland.
Raya suno kana ro rason kung ham-an kaeabanan sa mga pumueoyo hay mas gustong magtinir sa guwa kapareho it baybayon ag mga parke.
Haeos sang dominggo eon sigon ro andang na-eksperyensyahan nga grabeng kainit it tyempo.
Makabig sigon nga iba ro epekto it silak it adlaw bangud masakit raya kun magtama sa panit.
Agud nga mahagan-haganan ro kadangga, ginapakamayad sigon nanda nga buksan ro bintana para makasueod ro hangin.
Nasayuran nga ro mga baeay sa Scotland hay owa naka-desinyo para sa tyempo it tag-init.
