KALIBO, Aklan—Nagapati si Aklan 1st District Sangguniang Panlalawigan member Atty. Harry Sucgang nga bangud sa sigidas nga recruitment it Partido Demokratiko Pilipino–Lakas ng Bayan ukon PDP-Laban rason nga nakaangkon makaron it gulo sa sueod it partido samtang nagahilapit ro eleksyon sa 2022.
Suno kana nga owa eon masyadong ginasunod ro polisiya it partido eabi eon sa pagpili it igasabak nga kandidato.
Madumduman nga naging mainit ro bakbakan nanday Senador Manny Pacquiao, chairman it partido ag vice chairman kara nga si Energy Secretary Alfonso Cusi ag iba pang PDP-Laban members matapos nga ginduso nanda ro kandidatura ni President Rodrigo Duterte sa pagka-bise presidente.
Gusto ni Pacquiao ag ko iba pang kaalyado nga samtang may ginaexperiensiyahan pa nga pandemya sa nasyon tuga it COVID 19 hay ipaiway anay ro politika.
Nasayuran nga suportado man it iba pang paksyon it partido ro pagpa-ilihir ni Duterte bilang vice president, ka-tandem ro anang unga nga si Davao City Mayor Sara Duterte bilang presidente.
Bangud kara, ginsuhestiyon ni Atty. Sucgang nga tiempo eon agud nga ireporma ro political party system sa nasyon pinaagi sa pagduso nga daywang partido eamang ro ipatuman agud nga malikawan ro magulo nga eleksyon sa tunga it mga banggi-anay nga mga pulitiko.
