KALIBO, Aklan—Ginkalipay it grupong Bagong Alyansang Makabayan ukon Bayan Aklan ro pagbasura it International Criminal Court (ICC) sa apela it gobyerno it Pilipinas nga punduhon eon ro imbestigasyon sa ‘war on drugs’ ko tyempo ni dating Pangueong Rodrigo Duterte.
Suno kay Mr. Kim Sin Tugna, provincial coordinator it Bayan Aklan nga nagakadapat gidman ro naging desisyon it ICC agud nga mataw-an it hustisya ro linibong indibidwal nga naging biktima it gyera kontra illegal nga droga it dating administrasyong Duterte.
Sa kamatuoran suno kana hay maabo ro andang nadokumento nga mga inosenteng tawo nga nabiktima eamang it mga otoridad bangud sa mando nga makabaton it padya ro makaaresto ukon makapatay it mga ginasugid nga durugista.
Angot kara, gintaw-an eon it ‘green light’ it ICC si Prosecutor Karim Khan nga buksan it uman ro imbestigasyon.
Madumduman nga ko buean it Enero kat unang gintaw-an it awtorisasyon ro pagpadayon sa imbestigasyon matapos nga uwa makuntento ro ICC sa ginhimo nga inisyatibo it gobyerno it Pilipinas sa kaugalingon nga imbestigasyon sa mga libu-libong kaso it pagpatay tuga it kampanya sa iligal nga droga.
