KALIBO, Aklan— Uman nga nabawi it Black Beauty Boys it Barangay Linabuan Norte, Kalibo ro kampeonato sa Tribal Big category it Sadsad Ati-Atihan Street Dancing Contest sa makolor ag magarbong Kalibo Sto. Niño Ati-Atihan Festival 2019.
Ko nagtaliwan nga dag-on hay napas-eawan ro nasambitang grupo nga maangkon ro kampeonato sa ika-waeo kunta nga sunod-sunod nga kahigayunan matapos nga magdaog ro hugot nga karibal nga tribung Vikings it Barangay Dumga, Makato, Aklan nga gindeklarang second place winner nga nagbaton it P150,000.
Hataw ro andang naging performance suksok ro andang makolor nga costume rason nga napabilib ro mga judges.
Naangkon man nanda ro Best in Costume samtang ro Vikings hay Best in Street Dancing ag Best in Beat/Sound.
Ko Sabado, Enero 19, sa judging day, bisperas it kapyestahan ni Sr. Sto. Niño de Kalibo, nagpakitang gilas ro 34 nga partisipanteng tribu ag grupo sa nagkaeain-eain nga kategorya nga ginakaeakipan it Balik Ati, Tribal Big ag Tribal Small kamana man sa Modern Group.
Ro Black Beauty Boys hay nagbaton it trophy ag cash prize nga P250,000.
Una man sa ikatlong pwesto ro Libtong Boys it Kalibo nga may premyong P120,000.
