Nagapanawagan ro World Health Organization (WHO) it insigidang ceasefire sa nasidlangang parte it Democratic Republic of the Congo (DRC) agud nga mabaeabagan ro pagkalhit it Ebola samtang padayun ro bakbakan sa rehiyon.
Suno sa WHO, naga-grabe ro outbreak it Ebola sa tunga it nagapadayun nga kinagamo butang nga nagadueutdutan ro mga nag-evacuate sa mga evacuation ag displacement camps kun sa siin mas madasig nga nagakalhit ro sakit.
Ginpahayag ni WHO Director-General Tedros Adhanom Ghebreyesus nga ro sitwasyon sa eastern DRC hay eubus nga naapektuhan it giyera ag sakit, kun sa siin, nabudlayan ro mga health worker nga makatau it bulig bangud sa kinagamo.
Suno kana nga indi magiging epektibo ro pagsabat sa outbreak kun padayun ro pagpamomba ag bakbakan rason nga nagapanawagan imaw sa magtimbang nga parte nga magpatuman it insigidang ceasefire.
Ro presenteng Ebola outbreak hay halin sa Bundibugyo strain, nga owa pa it aprubadong bakuna ukon bueong ag gindeklara it WHO bilang international health emergency bangud sa madasig nga pag-abu it kaso.
Masobra sa 900 ro mga ginadudahan nga kaso ag kapin sa 200 ro ginadudahan nga namatay sa tatlong probinsya sa eastern Congo, kaibahan ro mga lugar nga kontrolado it mga rebeldeng grupo.
Suno sa mga humanitarian organization, maabu sa mga namatay hay mga unga, samtang ro mga refugee sites sa kaiping nga Uganda hay eampas eon sa kapasidad bangud sa pagdagsa it mga nag-evacuate.
