May plano ro Philippine Red Cross ukon PRC Aklan chapter nga maka-establisar it kaugalingon nga blood service facility sa probinsya.
Apang, suno kay Mary Joe Galleon, chapter administrator it PRC Aklan chapter, mabahoe raya nga obligasyon bangud nga maabong requirements ro pagakinahang-eanon antes nga makaangkon it blood center.
Ginpahayag dugang ni Galleon nga may mga konsiderasyon sanda nga ginaisip apang nagrequest eon sigon sanda it suporta sa national headquarters.
Aminado si Galleon nga magaagi pa raya it series of proposals ag meetings it mga board of directors bangud nga sambilog sa ginakonsiderar hay ro kakueangan sa medtech ag doktor.
Apang, inde sigon maduea ro handom nanda nga makatukod it kaugalingon nga blood service facility ro PRC Aklan.
Sa makaron hay sa probinsya it Capiz ro blood center bilang lead service facility it PRC kon siin ro ginaprovide nga dugo it PRC Aklan hay idto pa ginadaea para ieksamin ag iproseso antes nga itayon sa pasyente nga nagakinahang-ean it dugo.
