KALIBO, Aklan—Makasarang ag preparado eon ro isla it Boracay nga magbaton it mga dumueuong nga turista suno kay Malay Mayor Frolibar Bautista.
Suno kana nga pinaagi sa pagbueuligan it LGU-Malay, gobyerno probinsiyal it Aklan ag national government pinaagi sa Department of Tourism, makabig nga haum eon ro tanan nga mga kinahangeanon sa isla.
Gindugang pa kara nga haeos syento porsiyento eon nga bakunado ro mga tourism workers ag naabot eon man ro herd immunity ukon kapin sa 70% it mga eligible residents sa isla ag mainland Malay.
Mag-eowas kara, owa eon man sigon it mga ginatamaan it virus sa banwa it Malay ag bilog nga probinsiya it Aklan.
Nauna eon nga gin anunsyo it Department of Tourism nga pagapasugtan eon ro pagsueod it mga foreign tourists sa nasyon matapos nga aprubahan ro rekomendasyun it IATF nga pagapasudlon ro mga dumueuong nga biyahero halin sa mga green list ukon low risk countries.
