INTERNATIONAL News — Halin sa makahieilong nga ilimnon nga serbesa, pampasabog nga Molotov cocktail anay ro gina-obra it sangka brewery sa Ukraine agud nga depensahan ro andang nasyon kontra sa Russia.
Base sa report, makita ro mga bote nga gina-obrang pampasabog ag ginbutangan it litarto ni Russian President Vladimir Putin ag may nakabutang nga: Putin Huilo, nga ro buot hambaeon hay “Putin is a hell.”
Makita sa video ro mga Ukrainian samtang ginapahaum ro kinahon nga Molotov cocktail nga ginapadaea sigon nanda sa mga kababayan nanda nga ginadepensahan ro andang nasyon kontra sa tropa it Russia.
Nauna eon nga gin engganyo it gobyerno it Ukraine ro andang mga kababayan nga depensahan ro andang nasyon.
May una man nga ginpaguwa sa telebisyon kun paalin nga obrahon ro Molotov cocktails, ukon flammable liquid nga ginabutang sa bote nga may kaibahan nga tela nga nagasirbing mitsa.
Ginapadaea sigon ro mga Molotov cocktail sa andang barikada sa Lviv, ag may ginapadaea man sanda sa Kyiv.
Nagaeaum sanda nga maka-abot idtu ro mga Molotov matapos nanda nga masayuran nga ginpasabog eon man ro tulay nga paagto sa lugar.
Nagaeaum ro kaabuan sa mga taga Ukraine nga matapos eon ro kinagamo pinaagi sa pag-istorya agud nga malikawan ro pagkalhit it maabu nga dugo .
