Gin-aresto it mga pulis sa Tampa, Florida ro sangka bride kat matukiban nga may halong marijuana ro mga handa kara sa kasae.
Suno sa mga awtoridad, ginkasuhan it tampering, culpable negligence ag delivery of marijuana ro 42-anyos nga bride nga si Danya Glenny ag ro catering manager sa reception nga si Joycelyn Bryant.
Ko Pebrero 19, 2022 natabu ro insidente kun sa siin nakabaton it tawag ro 911 sa sangka guest sa kasae ni Glenny.
Nagapangayo it ambulansya ro guest bangud may kakaiba imaw nga nabatyagan matapos nga magkaon sa reception.
Nagsunud-sunod eon ro tawag nga nabaton it 911 agud nga magpangayo it medic ag bangud kara, rumesponde eon ro mga pulis sa reception.
Kaabuan sa mga guests hay na-high, nagsakit ro mga tiyan ag nagpaeanuka.
Insigida sanda nga gindaea sa South Seminole Hospital agud nga boengon.
Nagbo-oe it food samples ro mga pulis sa reception ag ginpa-usisa.
Nagpositibo sa marijuana ro haeos tanan nga pagkaon nga handa kapareho it chocolate-covered strawberry, pudding dessert ag lasagna.
Ginkwestiyon si Glenny it mga pulis kun nasayuran baea it anang mga bisita nga may marijuana ro anang mga handa.
Matapos nga magpamalibad hay dikara eon imaw gin-aresto it mga pulis.
Pagkamasunod nga adlaw hay nagsurender sa pulisya ro catering manager nga kasabwat ni Glenny.
Ginkulong sanda apang nakahilway temporaryo matapos nga magpiyansa.
