KALIBO, Aklan— Ginpasiguro it Department of Tourism (DOT) nga indi maeabag ro gintaeanang carrying capacity sa isla it Boracay makaron nga tyempo it Semana Santa.
Ginaeauman nga masobra sa 58,000 mga turista ro magabisita sa sikat nga isla kapin eon sa Huwebes Santo hasta it Dominggo it Pagkabanhaw.
Suno kay Tourism Undersecretary Arturo Boncato, Jr., ro numero sigon it mga turistang nagasueod hay kaparehas man it nagaguwa rason nga inde maeabag ro 19,215 nga carrying capacity kada adlaw kaeakip eon ro 6,405 tourist arrivals.
Agud masiguro suno kana nga inde maeabag ro nasambitang numero, nagbawas ro mga airline company it “air seats” paadto sa Boracay.
Una kara, nakipagpueong si Tourism Secretary Berna Romulo-Puyat sa Civil Aeronautics Board ag sa andang mga airline partners kon siin, ginhinyo kara nga intindihon eon lang ro nagapadayon nga rehabilitation effort sa isla.
Samtang, padayon man ro monitoring it Boracay Inter-agency Management Group (BIAMG) sa mga hotels reservation sa isla.
Nasayuran nga kapin sa 326 establishments nga may kabilugang 11,943 rooms pa eamang ro ginpasugtan it Inter-agency nga pwedeng magbaton it mga bisita ag bakasyunista sa Boracay.
