Kapareho it national headquarters, haeos 80 porsiyento eon man nga preparado ro Commission on Elections ukon COMELEC-Aklan para sa Barangay ag Sangguniang Kabataan elections sa December 5, 2022.
Raya ro ginpahayag ni Crispin Raymund Gerardo, tagapaghambae it komisyon sa Aklan.
Suno kana nga samtang owa it naga-eksister nga laye nga nagapaiway sa nasambit nga eleksyon hay owa nanda gina-isip ro posibilidad it pagpaisoe kara.
Nauna kara, natigayon eon nga maipasa sa committee level sa Kamara ro proposisyon it pagpaiway sa Barangay ag SK elections.
Sa kamatuoran suno kana hay ginapahauman eon man nanda ro pagdihon it certificate of candidacy ukon COC it mga nagaka-interes nga magpailihir nga kandidato nga maga-umpisa sa oktubre 6 hasta 13.
Apang ginahueat pa sigon nanda ro specific guidelines angot sa pagpatigayon kara.
Owa man suno kana it nakikita nga problema ro Comelec sa mga nabakae eon nga election paraphernalia engkaso nga indi madayun ro eleksyon bangud nga pwede pa raya nga magamit sa igataeana nga bag-ong petsa kamana man nga mano-mano ro eleksyon ag bukon it automated.
Samtang, ginpaathag ni Gerardo nga indi basta-basta nga ma-postpone ro national and local elections bangud nga nakabaehag raya sa laye kumpara sa barangay and sangguniang kabataan elections nga nakadepende raya sa pagdesisyon it manaba ag mataas nga kapueongan it kongreso.
