KALIBO, Aklan—Nagapanawagan ro Commission on Elections (Comelec) nga kinahang-ean nga makaangkon it klarong desisyon sa mas madaling panyempo kon madayon ukon mapaiway ro nakataeana nga Barangay ag Sangguniang Kabataan Election sa maabot nga Nobyembre 2, 2026.
Suno kay Comelec Aklan spokesperson Chrispin Raymund Gerardo, all set eon ro preparasyon it komisyon bangud nga hasta sa uwa it kumpirmasyon ukon laye nga nagahambae nga mapaiway ro eleksyon hay inde man sanda magpundo sa andang ginahimo nga pagpreparar.
Base sa andang central office, dapat masayuran ro magiging desisyon bago matapos ro Setyembre, bangud nga base sa andang calendar of activities hay nakataeana ro filing of candidacies halin Setyembre 28 hasta it Oktubre 5.
Ginpahayag dugang ni Gerardo nga padayon nga nagapahaom ro mga field personnel it Comelec bangud nga kinahang-ean it laye kon mapaiway gidman ro eleksyon sa maabot nga buean it Nobyembre.
Nauna eon nga gin-aprubahan it Senate panel ro mga proposisyong laye nga nagatuyo nga ipaiway ro BSKE 2026.
Sa idaeom it Senate Bill No. 2387 ni Senator Francis Escudero, tuyo kara nga amyendahan ro Republic Act No. 12232 ag himuon nga limang dag-on halin sa presenteng ap-at nga dag-on ro termino it mga barangay ag SK officials.
Samtang si Senator Imee Marcos mat-a ro nagdihon it Senate Bill No. 2067, nga nagatuyong isaylo ro BSKE halin Nobyembre 2026 paadto sa Oktubre 2027.
