KALIBO, Aklan — Nagpadumdum ro Commission on Elections (Comelec)-Kalibo sa mga lokal nga kandidato sa ginpatigayon nga national and local elections ko Mayo 12 nga temprano nga magsumite it andang Statements of Contributions and Expenditures (SOCE) ag indi eon paghueaton ro deadline.
Raya ro ginpahayag ni Atty. Christian Itulid, election officer it Comelec-Kalibo.
Suno kana nga indi eon pagpaeawigon it komisyon ro deadline para sa pagdihon it SOCE.
Ro last day sigon sa pagsumite kara hay sa Hunyo 11 ukon 30 diyas pagkatapos it eleksyon sandig sa Republic Act 7166.
Owa sigon it kinamatarung ro Comelec nga bag-uhon ro deadline bangud nga raya hay nakabaehag sa laye.
Ginpahayag dugang ni Atty. Itulid nga ro mga nagdaog nga kandidato hay indi pwedeng magpanerbisyo hasta nga indi makasumite it SOCE maskin pa nga nakapanumpa eon sa pwesto.
Kadungan kara, nagpaandam imaw sa mga nagdaog ag napiyerde nga kandidato nga mapas-eawan nga makasumite it SOCE nga posibleng magapangatubang it kasong administratibo.
Ro 1st offense hay pwedeng magatuga it multa ag ro ikaywang pag-eabag hay posibleng hasta nagakabuhi nga diskwalipikasyon.
