Ginpahayag ni ACT Teachers party-list Rep. Antonio Tinio nga sangka “failure” ro K-12 program sa Pilipinas, kasunod it report it Second Congressional Commission on Education (Edcom 2) nga nagapakita nga 87 porsyento it mga Grade 11 students hay nabudlayan sa reading comprehension.
Suno kay Tinio matapos ro pagpamati it House committee on basic education, ginapakita it datos ro maeapnagon ag sistemikong problema sa edukasyon.
Ginbulgar pa nga may mga kaso nga ginapapasar ro sangka estudyante sa masunod nga grade level maskin nga owa nasabat ro minimum competencies, rason nga maabu sigon ro nakaka-graduate apang indi makasarang nga mag-intindi it ginabasa.
Sa pagpamati, ginpahayag man it Edcom 2 nga owa pa eubus nga nasabat it Department of Education (DepEd) learning recovery program nga ARAL ro learning gaps bangud sa kakueangan sa tutoring ag manabang attendance it mga estudyante.
Ginsuhestiyon man nga posibleng kinahangean nga i-rethink ro Grade 12 sa idaeum it strengthened senior high school program.
Ro K-12 program hay ginpatuman kato it administrasyon ni dating Pangueong Benigno Aquino III agud nga ipasaka ro sistema it edukasyon it Pilipinas sa 13-year pre-university standard. Apang suno kay Tinio, owa kara naresolba ro manabang lebel it literacy it mga estudyante.
Nauna eon nga nagguwa ro mga report it UNICEF ag PISA nga nagapakita it manabang performance it mga estudyanteng Pilipino sa reading, math, ag science kumpara sa ibang nasyon.
Ginsuhestiyon ni Tinio ro pagpataas it sweldo it mga manugturo, dugang nga mga teachers, pagbalik sa paggamit it mga libro, ag mas kapati-pati nga grading system. Ginpamilit pa nana ro mas maayos nga training para sa mga manugturo.
Suno man kay House Committee on Basic Education Chair Rep. Roman Romulo, dapat tutukan it DepEd ro nagapangunang problema sa reading comprehension kaysa magpatuman it bag-ong polisiya, ag magbalik sa basic learning foundations.
Base sa datos it Philippine Statistics Authority, ginaboeobanta nga 18.96 milyong high school graduates ko 2024 ro ginakabig nga functionally illiterate bangud nga kaintigo nga magbasa apang nabudlayan nga mag-intindi sa ginabasa.
