Bukas si Aklan second district board member Jay Tejada engkaso nga magpatigayon it legislative inquiry ro sangguniang panlalawigan angot sa pagpataas it Aklan Electric Cooperative ukon Akelco it power rate nga kapin sa P1.55 sa mga member-consumers sa residential area.
Suno kana, ro ginata-o nga rason it kooperatiba hay bangud sa market demand ag ro epekto it gyera sa tunga it Russia ag Ukraine.
Apang ro computation it rate kon ham-an it makaruyon kataas ro ginsaka hay kinahang-ean it eksplinasyon maghalin kanda para eubus nga maintindihan it mga pumueoyo.
Nasayuran nga makaron nga buean it Setyembre ginpatuman it kooperatiba ro dugang nga panueoktan sa kuryente nga ginkakibot man it mga konsumidor bangud sa mataas nanda nga electric bill.
Samtang sa pihak nga parte, bilang alternatibo hay ginpahayag ni Tejada nga pwede mag-invest sa mga solar power partikular ro mga government facilities para mabuhinan ro paggamit it electic supply nga ginadistribute it Akelco.
Apang, nagakinahang-ean sigon raya it mabahoe nga investment ag maid-id nga pagplano.
