Nag-umpisa eon ro conclave sa Vatican agud pilion ro kabueos ni Pope Francis nga namatay ko Abril 21, sa pinaagi it pagboto sa Sistine Chapel.
Kinahang-ean mabuoe it sangka kandidato ro daywa sa tatlong parte it boto halin sa 133 cardinal electors agud maging bag-ong Santo Papa.
Kon uwa it napiling papa matapos ro tatlong adlaw, ro pagboto hay pagapunduhon it 24 oras agud magtao it oras sa mga cardinal nga magpamaeandong.
Ro resulta it kada round it botohan hay igapahayag sa pinaagi it aso halin sa tsimenea it Sistine Chapel, itom nga aso kon uwa it napili ag puting aso kadungan it pag-bagting it lingganay kon may bag-ong Papa eon.
Ro mga boto hay igasueat sa papel, ginapilo, ag ginabutang sa sangka espesyal nga urn sa altar it Sistine Chapel agud mapabilin ro sekretong botohan.
Kon uwa it napiling papa matapos ro 33–34 rounds it botohan ukon kapin sa 13 diyas, makaangkon it runoff vote sa tunga it daywang nagapangunang kandidato agud matumod ro masunod nga Santo Papa.
