Temporaryong ginpapundo it lokal nga gobyerno it Makato ro nakataeana nga construction it pabaeay sa idaeom it proyekto it National Housing Authority ukon NHA sa Brgy. Dumga.
Raya hay kasunod sa ginpasa nga resolusyon it sangguniang bayan nga nagarequest kay Makato Mayor Ramon Legaspi III nga magpaguwa it cease and desist order sa nakataeana nga proyekto it national government.
Suno kay mayor Legaspi, nadiskubrehan it LGU nga uwa pa it nagakaigong dokumento nga ginapresentar ro construction company para sa andang proyekto partikular ro pinakaimportanteng permit ro ECC ukon Environment Compliance Certificate bangud nga presente pa raya nga nakapending sa regional office it Department of Environment and Natural Resources ukon DENR.
Ginpahayag dugang nga mismong ro barangay council it nasambit nga lugar hay nagpaabot it andang concern sa anang taeatapan bangud sa pagkasamad it andang karsada sa pag-inagi it maeagko nga saeakyan it construction firm.
Ginapahaom eon sigon it contractors ro eogta nga pagapatindugan it pabaeay apang uwa pa sanda it ginabuytan nga maskin anumang dokumento rason nga ginpakamayad it LGU nga padaehan sanda it notice kasunod man sa ginpatigayon nga inspeksyon sa lugar it municipal engineer nga umabot pa sa tatlong beses apang uwa it maskin anuman nga sabat halin sa pihak nga kampo.
Sa oras suno kay Mayor Legaspi nga makumpleto it mga raya ro dokumento ag mapamatud-an nga para sa kamaeayran it tanan ag inde maperwisyo ro anang mga constituent hay posibleng maipadayon ro proyekto.
