KALIBO, Aklan — Ginbansagan ni dating US President Donald Trump ro grabeng pagbagsak it stock market sa nasambit nga nasyon sa “ Kamala Crash”.
Raya hay kasunod it pagdeklara kay Vice President Kamala Harris bilang presumptive Democratic presidential nominee matapos ro pormal nga pag-atras ni US president Joe Biden sa anang kandidatura.
Suno kay Bombo International Correspondent Pinoy Gonzales it Texas, USA nga ginakabaeak-an makaron ro pag-angkon it recession bangud sa paghina it ekonomiya ag pagtaas it mga baeak-eon.
Dugang pa ni Gonzales nga mabuhay eon nga gina-predict ni Trump ro pag angkon it economic depressions bangud sa mahina sigon nga political leadership kun sa siin hay nauyang suno kana ro pagtinguha it anang administrasyon nga mapataas ro stock market kun sa siin naapektuhan eamang bangud sa pagtama it COVID-19 pandemic.
Gina-engganyo sigon makaron ro mga botante sa nagahilapit nga eleksyon sa Nobyembre nga magpili it mayad it andang igaboto .
Ro pwedeng mapilian sigon hay ro pag-angkon it kasoehayan sa pagdumaea ni Trump ukon ro Kamala crash ag ginatawag nga great depression ag posibleng pagtuhaw it World War III kon si Harris ro pagabotohon.
Nasayuran nga ginakampanya makaron ni Harris ro kaabuan man sa mga economic policies nga ginduso ni Biden, eakip ro pagpaeapad sa social safety net ag serbisyo it gobyerno kamana man ro pagsabat sa gastos sa child care ag utang it mga estudyante.
Samtang ginapromisa mat’a ni Trump nga panabaan ro buwis nga ginabayaran eabi eon ro mga tax sa tips ag paggamit it taripa agud nga mapabaskog ro domestic industry nga insigidang ginbatikos it mga Democrats sa paghambae nga magapataas eamang raya sa gastos it mga konsumidor.
