KALIBO, Aklan—Nagapadayon ro remote ag physical enrollment it Department of Education ukon DepEd sa mga pampublikong eskwelahan.
Suno kay Assistant School’s Division Superintendent Dr. Jose Niro Nillasca it DepEd Aklan, nagbutang eon sanda it enrollment drop box sa barangay hall ag sa mismong eskwelahan bilang pagsunod eon man sa health protocols tuga it Covid-19.
Sa nasambit nga drop box, dikara ihueog it mga ginikanan ro andang ginfill-apan nga learners enrollment ag survey form.
Nasayuran nga hasta sa June 21 hay naka-work from home gihapon ro mga manugturo.
Kapin sa 35 porsyento pa eamang sigon ro kabilugang numero it mga nagpa-enroll sa pampublikong eskwelahan samtang sa pribado hay mas manaba pa sa nasambit ng porsyento.
Aminado si Nillasca nga nagaduha-duha gihapon ro mga ginikanan kon patun-on nanda ro andang mga inonga makaron nga school year bangud gihapon sa nagapadayon nga paeag it Covid-19 pandemic.
Nauna eon nga gin-insister ni Pangueong Rodrigo Duterte uwa it face to face classes nga matabo sa pagbukas it klase sa Agosto 24 para sa school year 2020-2021 hasta nga uwa it bakuna nga madiskubre para sa Covid-19.
Apang, nakahaom ro DepEd sa anumang hangkat kaangot sa nakataeanang implementasyon it mga alternatibo sa pisikal nga mga klase, kaparehas it online ukon modular learning para sa nagahilapit nga pagbukas it klase.
