KALIBO, Aklan—Kuntento ro Department of Education ukon DepEd Western Visayas sa naging performance it mga student athletes nga nagpasakop sa Palarong Pambansa 2023 nga ginpatigayon sa Marikina City.
Suno kay Mr. Hernani Escullar Jr., DepEd region 6 spokesperson nga malipayon sanda bangud nga natigayon eon nanda nga maeampasan ro numero it mga nahakot nga bueawan nga medalya sa sporting event nga ginpatigayon antes ro pandemic ko 2019.
Mag-eowas kara, pila sa mga players it rehiyon hay nakalista it mga bag-ong records partikular sa athletics.
Sa pagtapos it palaro hay napabilin ro 2nd place sa overall nga medal tally.
Ro nagdaog makaron nga dag-on sa national sports event hay gin-rank base sa numero it mga gold medals.
Nasayuran nga ro Western Visayas hay nagpangatlo nga pwesto ko nagtaliwan nga Palaro nga may 49 gold, 40 silver, ag 73 bronze medals.
Gindugang pa ni Escullar nga naging hugut nanda nga kaengkwentru ro National Capital Region (NCR) ag CALABARZON.
Sa pihak nga parte, makaron nga domingo hay magabiyahe eon pauli ro mabaskog nga contingent it rehiyon nga ginaeakipan it 539 athletes; 131 coaches, assistant coaches ag chaperones; kamana man ro 143 nga miyembro it technical working group.
