Washington DC, USA — Pormal eon nga nagpanumpa bilang ika-47 nga presidente it Estados Unidos si Donald Trump.
Ginpangunahan ni Chief Justice John Roberts ro pagpanumpa ni Trump sa sueod it Capitol Rotunda.
Mag-eowas sa Abraham Lincoln bible para sa pagpanumpa, ginamit ni Trump ro anang personal nga bibliya.
Ro nasambit nga bibliya hay ro anang ginamit man sa unang termino nana bilang presidente ko 2017.
Matapos ro pagpanumpa hay nagpaeopok it canyon ro US military bilang tradisyon sa pagkilaea kana.
Ginpatigayon sa sueod it Capitol Rotunda ro pagpanumpa makaron bangud sa grabeng kaeamig it panyempo sa guwa.
Ulihing ginpatigayon ro indoor nga pagpanumpa hay ko tyempo ni dating US President Ronald Reagan ko 1985.
Samtang, diretsahang ginpahayag ni US president Trump nga daywang kasarian eamang ro pagakilaeanon it gobyerno nga ginakaeakipan it eaeaki ag babaye.
Suno kana, ro kaayusan angot sa kasarian hay adbokasiya it administrasyon para depensahan ro kababayin-an halin sa ekstremismo sa gender ideology ag ibalik ro kamatuoran angot sa biyolohiya sa gobyerno.
Tuyo man kara nga himuon nga opisyal ro paggamit it “sex” imbes nga “gender” sa mga dokumento kaparehas it pasaporte ag visa.
Ginabawaean man ro paggamit it pondo it gobyerno para sa gender-transition healthcare ag nagatuyo nga magtao it mas maabong privacy sa mga pasilidad kaparehas it kulungan, migrant shelters, ag rape shelters.
Sa pihak kara, antes ro pagpanumpa ni Trump hay nagpanumpa eon man bilang anang bise presidente si JD Vance nga ginpangunahan ni Supreme Court Justice Brett Kavanaugh.
Nagtambong sa nasambit nga pagpanumpa ro mga napiling magabilog it anang gabinete kamana man ro mga dating presidente it Estados Unidos ag andang mga asawa.
