KALIBO, Aklan – – – Nagpaandam ro Department of Tourism ukon DOT Region VI sa publiko kontra sa tourism establishments sa Western Visayas nga nagapakuno-kuno nga accredited kanda.
Sa interview it Bombo Radyo, ginpahayag ni DOT-6 Director Atty. Helen Catalbas nga kinahangean nga maging vigilante ro mga pumueuyu sa pakikipag-transaksyon sa mga bukon it DOT-accredited establishments.
Raya hay matapos nga makabaton suno kana sanda it nagkaeain-eain nga report nga may pilang tourism entities ro nagapatigayon it aktibidades kapareho it pag-solicit gamit ro pangaean it DOT-6.
Agud nga indi mapahamak, ginlaygayan ni Atty. Catalbas ro publiko nga makipag-transaksyon eamang sa mga establisimento nga accredited sa DOT ag usuyan it accreditation ID, sticker ag certificate.
Gindugang pa kara nga indi magduha-duha nga magtawag sa andang opisina para sa dugang nga beripikasyon.
Suno pa kay Atty. Catalbas nga ro nasambit nga grupo it mga manugloko hay nagagamit it nagkaeain-eain nga modus.
Sambilog sigon sa mga nabuking hay ro pagpatigayon it school-to-school ag naga-offer sa mga manugturo it discount card sa manaba nga presyo nga pwede magamit sa sueod it sang dag-on para sa libre nga accomodation sa maskin siin man nga lugar nga pagabakasyunan.
Owa sigon it makarondaya nga programa ro DOT-6.
