KALIBO, Aklan—Ginkalipay ni Malay Sangguniang Bayan member Allan Palma Sr. nga nakaangkon it positibong sabat ro anang ginduso nga resolution angot sa problemang ginapangatubang sa mainland Malay partikular ro mga pagbaha-baha nga naeksperyensyahan sa mga low lying areas bangud sa pag-apaw it mga suba eabi eon ro Napaan ag Nabaoy river.
Suno kana, gin-alokaran it kapin sa P235 milyon pesos it Department of Public Works and Highways ukon DPWH ro nasambit nga kasubaan agud nga mabutangan it revetment wall nga inde eon makasueod ro tubi-baha sa mga kabaeayan maeapit sa nasambit nga kasubaan.
Posibleng matuman raya sa dag-on 2024 matapos ro makapilang beses nga pag-follow up ag paghueat sa ginaduso nga proyekto.
Apang sa makaron hay nagapadayon ro dredging operation kon sa siin raya man ro naging rason nga uwa it nailistang mga pagbaha-baha sa nasambit nga lugar eabi eon ko mga nagtaliwan nga inadlaw nga pag-inuean tuga it Hanging Habagat nga mas ginpabaskog it Bagyong Betty.
