KALIBO, Aklan–Uman nga nag-uli it kadungganan sa probinsya it Aklan ro sangka manugturo matapos nga maging isaeahanon nga nagbaton it pagpasidungog sa bilog nga Western Visayas it 2022 Awards Rites for Outstanding Government Workers nga ginhiwat sa Palasyo it Malacañang ko Marso 8.
Ro awarding ceremony hay mismong ginpangunahan ni Pangueong Ferdinand Marcos Jr.
Ginpahayag ni Dr. Ju-im Jimlan, Head Teacher I it Tamalagon Integrated School nga grabeng kalipay ro anang nabatyagan matapos nga mapasa-alima ro award bangud sa 147 regional qualifiers halin Luzon, Visayas ag Mindanao hay napueo eamang ro ginabuoe para sa Dangal ng Bayan National Awardee.
Aminado si Dr. Jimlan nga maabo ro anang gin-agyan antes nana nabuoe ro kadaeag-an.
Sambilog eon kara ro maidid nga pag-usisa ukon pagsaea sa andang mga ginapasa nga dokumento ag credintials para ma-qualify.
Nasayuran nga naka-sentro ro anang proyekto ag adbokasiya sa pag-amlig sa palibot kung siin naglunsar imaw it Eco-center thinking ukon Tuklas Aral; Eco-focus teaching ag Eco-motivated actions.
Mag-euwas kara, may iba pa imaw nga proyektong ginahimo para sa komunidad partikular ro Project I-Speak, I-Share ag I-Care kung siin ro napueong porsyento it anang bueanan nga sweldo hay ginataeana nana para sa pagbakae it school supplies.
Raya sigon nga proyekto hay pitong dag-on eon nga naga-eksister.
