KALIBO, Aklan—Nagapati si Senate Minority Leader Franklin Drilon nga eabag sa laye ro mandu ni Pangueong Rodrigo Duterte nga indi pagpatambungon ro anang mga miyembro it gabinite ag opisyal it ehekutibo sa imbestigasyon it Senado.
Raya hay may kaangtanan sa transaksyon it gobyerno sa Pharmally Pharmaceutical Corporation.
Suno kay Drilon nga pwede eamang nga bawaean sa pagpamati ro mga opisyal kon ro isyu hay may implikasyon sa isyung national security ag kon mausisa ro military ag diplomatic secrets kamana man ro personal nga pag-istorya it presidente ag ko anang gabinite.
Ginpahayag dugang nga nakaangkon eon it resolusyon kara ro korte suprema sa kasong imaw mismo ro nagpasaka ko 2006 angot sa north rail projects sa termino ni dating pangueong Gloria macapagal-arroyo.
Ro isyu sigon it maanomaliyang paggamit it pondo it nasyon hay makabig nga graft and corruption nga kinahangean nga taw-an it klaru it mga opisyal.
May bastante eon sigon sanda nga ebidensiya sa nasambit nga isyu.
Mag-eowas sa Pharmally , may iba pa sigon sanda nga kompaniya nga paga-imbestigahan.
21 man sigon nga flights it airforce ro nag-agto sa china agud nga maghakot it supplies ag sangka barko it Philippine navy nga puro tanan gastos it gobyerno.
Samtang, sa pagbaliktad it pahayag ni Krizel Mago, sangka opisyal it pharmally sa pag-atubang sa pagpamati it manaba nga kapueongan it kongreso, posibleng magapangatubang imaw sa kasong perjury.
Makabig sigon nga sinumpaan nga panaysayon ro ang mga ginpahayag sa hearing it senate blue ribbon committee.
