Agud nga mas pang mapaeapit sa tawo ag inde ro mga raya magdueotdutan sa sangka venue, ginpakamayad it Department of Social Welfare and Development ukon DSWD nga dugangan ro pay-out centers para sa mga kumpirmadong maka-avail sa educational assistance sa idaeom it Assistance to Individuals in Crisis Situation ukon AICS.
Raya ro ginpahayag ni Beverly Salazar it DSWD Aklan sa pangatlong Sabado it pay-out sa may mga kumpirmasyon maghalin sa ahensya nga makabueo it ayuda pinaagi sa pagregistered nanda online bangud nga uwa eon sanda nagabaton it mga walk-in nga kliyente.
Ro unang pay-out center hay sa ABL Sports Complex kon siin dikara pagabatunon ro mga kliyenteng taga banwa it Kalibo, Batan, Lezo, Malinao, New wash ag Numancia nga nagaabot sa 694 ka mga indibidwal.
Samtang sa Teodosio’s Park mat-a ro mga taga munisipalidad it Banga, Altavas, Balete, Libacao ag Madalag nga may 234 ka mga kliyente.
Kamana man sa Ibajay Social Hall pagabatunon ro kapin sa 372 nga kwalipikadong registrants maghalin sa Buruanga, Nabas, Ibajay, Makato, Malay ag Tangalan.
Samtang, ro mga kliyente nga uwa nag-abot ko Agosto 27 nga pay-out ag ro may mga kueang nga requirements hay sa ABL sanda mag-adto.
Maga-umpisa it alas-7:00 it agahon ro assessment ag pay-out sa mga kwalipikadong kliyente.
Daehon eamang ro andang kumpletong requirements agud nga inde mauyang ro andang pagpanaw.
