Nagpangayo it pasaylo si Department of Social Welfare and Development (DSWD) Sec. Erwin Tulfo matapos nga magdaea it kinagamo sa pilang taeatapan nanda ro programa sa Educational Assistance Payout sa mga student-in-crisis.
Tuyo it nasambit nga programa sa idaeom it Assistance to Individuals in Crisis Situations (AICS) hay makabulig sa pagbakae it mga estudyante it andang school supplies ag iba pang kagamitan ag kinahangeanon sa pag-eskwela.
Ginpaathag man ni Tulfo nga ro nasambit nga programa hay wa sigon napaabot it dating administrasyon it DSWD ag maabo sigon ro nagbuhos sa mga taeatapan nanda nga makaron eamang nasayuran may kaangtanan sa nasambit nga proyekto.
Suno man kay DSWD spokesperson ag Asec. Rommel Lopez, ginaaku nanda nga “na-overwhelm” sanda ag owa ginaeauman ro response it maabo nga nagakinahangean it bulig.
Nasayuran nga kaabuan sa mga nagpila sa pilang taeatapan it DSWD hay aga-aga pa eamang hay nakapila eon samtang ro iba man hay nagpataliwan pa it sang gabie.Kaabuan sa mga nagpila hay bukon eamang it mga estudyante kundi maging ro mga benipisaryo it 4Ps nga nagpadugang pa sa buhos it mga tao.
Kasunod kara, ginpasiguro man ni Asec. Lopez nga magapatuman eon sanda it pagbag-o sa mga masunod nga payout para indi eon mauman ro mga nag-eontad nga gulo sa pilang mga taeatapan.
