Kalibo Aklan —— Aminado si Department of Social Welfare and Development (DSWD) Assistant Secretary for Specialized Programs, Rhea Peñaflor nga nakaangkon it “miscommunication” sa pagtaeana it alokasyon it andang Field Office sa Local Government Units (LGU) sa bilog nga Rehiyon VI.
Suno kana nga napaathag eon it DSWD Region VI kon ano ro natabu sa mga LGUs .
Ginpasiguro man nana nga maga-usoy it pondo ro gobyerno para sa mga beneficiaries nga indi makabaton it bulig pinansiyal nga makakas sa listahan bangud sa natabu nga pagkasaea.
Dapat suno kana nga magtrabaho eon ag ipatuman ro nasambit nga programa sandig sa anang guidelines.
Angot kara, nag-apela imaw sa mga LGUs sa bilog nga Western Visayas nga mag-move on eon bangud nga bukon it makaron ro tiempo agud nga magbaeasuean kundi ro kinahangean hay ro pagbueuligan it kada isaea agud nga mas pang mapadasig ro pagpanupod it bulig sa mga beneficiaries.
Samtang, gin-engganyo man kara ro mga Barangay Officials nga saea-on it husto ro mga angay ag bagay nga benepisyaryo sa Social Amelioration Program (SAP) ag indi pag-eaktan it pamulitika.
Ro mga benepisyaryo nga makabaton it 6, 000 pesos hay ro mga Senior Citizens, Person’s With Disability (PWD’s), mga nabdos ag nagapasuso, solo parent, OFW’s in distress, mga owa it baeay, Indigenous People, owa it permanente nga trabaho, mga kabulig sa baeay, laundry maid, pakyaw workers, construction workers, driver it traysikad, tricycle, jeep, taxi ag public utility vehicle, micro entrpreneur ukon nagapanag-iya it sari-sari store, mga mangunguma, mangingisda, mga nagatrabaho sa eanas nga owa naka-avail it bulig it Department of Agriculture, sub minimum wage earner ag mga empleyado nga no work no pay nga owa naka-avail it bulig sa Department of Labor and Employment (DOLE).
Ginpaathag pa ni Penaflor nga ro kwarta nga mabaton it Pantawid Pamilyang Pilipino Program (4P’s) beneficiaries hay ro dugang eon lang sa cash grant ag rice subsidy nga andang nabaton agud makumpleto ro kabilugan nga 6,000 pesos.
Ginpaathag pa kara nga sa Senior Citizens, maskin nga may monthly stipend sanda hay bilog gihapon nga 6,000 pesos ro anang mabaton bangud man sa Magna Carta for Senior Citizens.
