KALIBO, Aklan—Ginpaathag it Department of Trade and Industry (DTI-Aklan) nga ginapasugtan ro online barter kung personal transaction ag bukon it para sa negosyo.
Suno kay DTI- Aklan provincial director Ma. Carmen Ituralde nga ro online business barter transactions eamang ro ginabawaean.
Sandig man sa ginpagguwa nga statement ni Trade and Industry Secretary Ramon Lopez nga ro ginabawaean eamang nga magbayluhan it produkto online hay ro regular nga negosyo ag owa nakarehistro.
Una kara, nagpadumdom ro DTI sa mga indibidwal nga involved sa online barter trade ag sa mga online sellers nga magparehistro sa Bureau of Internal Revenue.
Ginpabutyag dugang nga maskin ginapasugtan ro barter trade sa pilang parte it Mindanao pareho it Sulu ag Tawi-tawi, ginabawae man gihapon raya sa ibang parte it nasyon.
Ginklaro man kara nga ro local barter trade hay owa ginabawaean apang subject sa regulasyon nga kinahangean magparehistrado ag mabuwisan kung raya hay sangka negosyo.
Exempted man sa value added tax (VAT) ro indi makaabot it P3 milyon ro ginakita sa sueod it sang dag-on.
Sa makarun hay ginatutukan eun it composite team it DTI, Philippine National Police (PNP) ag National Bureau of Investigation (NBI) ro tanan nga online activity it mga online seller.
Madumduman nga nag-uso ro pagbayluhan it produkto gamit ro social media umpisa nga ginpatuman ro community quarantine sa mga lugar sa nasyon bangud sa COVID-19 pandemic.
