KALIBO, Aklan—Maka-uli eon sa andang lugar ro sangka eaeaki nga haeos daywang adlaw nga nagtikang halin sa Jamindan, Capiz paagto sa banwa it Kalibo matapos makaangkon it baeatian.
Ko adlaw it Domingo, Pebrero 26, nag-agto sa estasyon it Bombo Radyo Kalibo si Benedicto Bruce, sa legal nga edad agud nga magpangayo it bulig nga makauli sa andang lugar sa Cagayan Valley.
Pagkatapos magpanawagan, bumuhos ro bulig kana kaibahan ro sangka oil company nga nagsabat sa anang pamasahe sa bus ag barko paagto sa Cubao sa Manila.
Suno kana nga nagdesisyon imaw nga mag-uli eon lang sa anang pamilya sa Cagayan Valley bangud nga indi eon nana gusto nga maging pabug-at sa anang lola sa Jamindan, Capiz.
Indi eon sigon imaw pwedeng magtrabaho it mabug-at bangud sa sakit nga hernia ukon luslos.
Bangud sa kapas-eawan nga makapangayo it kwarta sa Jamindan para sa pamasahe rason nga nagdesisyon eon lang imaw nga magbaktas paagto it Kalibo agud nga maka-abot sa Caticlan, Malay.
Kaibahan sa mga nagtau it bulig sa eaeaki ro mga van drivers ag vendors sa terminal mag-eowas pa sa mga naghatud it bulig pinansiyal sa estasyon it Bombo Radyo butang nga nakatipon imaw it bastante nga pocket money ag pamasahe.
Samtang, ginpahayag man ni Myreen Dela Cruz it sangka bus company nga pagatinguhaan nanda nga makatau man it bulig kay Bruce hasta nga maka-uli sa andang probinsiya sa Cagayan Valley.
