Sangka eaeaki sa Singapore ro ginreklamo it anang mga kaeapitbaeay bangud nga dueueungan kara nga ginapa-andar ro siyam nana nga airconditioner sa anang maisot nga apartment!
Dueueungan nga ginapa-andar 24/7 it 63-anyos nga si Huang ro anang siyam nga aircon rason nga nagnaba sa 18 degrees celcius ro temperatura sa anang apartment unit sa Sengkang.
Bangud kara, naging rason raya it condensation sa bilog nga apartment building ag nakaangkon it black mold ro mga kaiping nga unit.
Suno sa sambilog sa mga nagareklamong kaeapitbaeay nga direktang nga una sa ibabaw it unit ni Huang, kinahangean kara nga maglampaso tatlong beses sa sang adlaw bangud sa condensation ukon naga tubi ro andang saeog.
Mag-eowas kara, ro mga kaiping nga unit ni Huang hay nagakabaeaka eon sa nagatubo nga black mold sa andang mga dingding ag kisame.
Bukon it manami sa ikamayad nga eawas kon makahanggop ag naagto sa lungs ro molds.
Suno kay Huang, nasayuran nga may lima imaw nga aircon sa living room, daywa sa master’s bedroom ag tig-sambilog sa tatlong iba pang kuwarto.
Ginpaathag nana nga kinahangean nga maeamig ro anang baeay bangud nga may anang liver cancer ag nakakabulig ro eamig sa anang immunity.
Bangud nga haeos bilog nga apartment building eon ro nagpasaka it reklamo, nagdesisyon nga maghalin si Huang sa anang gina-rentahan nga apartment ko Setyembre 17, 2022.
Suno sa mga report napilitan eon raya nga maghalin bangud nga owa kara nagustuhan nga gindaeahig pa it anang mga kaeapitbaeay sa reklamo ro mga awtoridad pati eon ro media.
