Gina-istoryahan makaron online ro sangka tumaeagsahon nga insidente sa United States matapos maging opisyal nga tag-ana si Zach Clark it kauna-unahang rehistradong patatas bilang gun silencer, nga gin-aprubahan it Bureau of Alcohol, Tobacco, Firearms, and Explosives (ATF), ro ahensiyang katumbas it firearms regulatory body it gobyerno it U.S.
Sa U.S., ro gun silencer hay ginakabig nga regulated firearm accessory. Kaeabanan nga instrikto ag mahae ro proseso it pagparehistro kara nga naga-abot sa ginatos nga dolyar ag gina-abot it pilang buean ukon dag-on antes nga maaprubahan.
Sa idaeum it bag-ong laye nga ginatawag nga One Big Beautiful Bill, ginhimo nga libre ag online ro pagparehistro it mga suppressor designs, sangka tikang nga nagatuyo nga padasigon ro proseso para sa mga legal nga gun owners.
Apang dikara eon nagsueod ro loopholes sa nasambit nga bill.
Bangud nga bukon it klaru kon ano ka-hugut ro beripikasyon sa mga ginasumite nga disenyo, ginpanipuslan raya it pilang gun owners para magrehistro it mga makaboeo-boeo nga bagay bilang “silencer” kapareho it mahaea, lata it energy drink, ag sa kaso ni Clark hay sambilog nga patatas.
Ginklaru ni Clark nga bukon nana it planong gamiton ro patatas sa baril, bangud nga siguradong maeunot eamang raya sa unang eupok. Ro anang tuyo hay ipakita ro mga loopholes it bag-ong sistema.
Suno pa kay Clark, posibleng naging random eon lang ro pag-apruba it ATF bangud sa dagsa it aplikasyon ag limitadong manpower.
Bilang eksperimento, nagsumite imaw it tatlong magkaseparado nga aplikasyon para sa tatlong patatas, kada sambilog hay may kaugalingon nga serial number: Tate001, Tate002, at Samwise01.
Sa pihak it magkaparehong dokumento ag detalye, daywa ro naaprubahan ag ro sambilog hay na-deny. Sangka resulta nga mas pa nga nagpabakod sa pagduda it publiko nga may buho ro proseso.
Sa social media, umani raya it kabo-eo-bo-eo nga reaksyon nga ginkumpara ro insidente sa “legal trolling” ag pamatuod nga maskin sa mga maumwad nga nasyon hay may mga laye sa gihapon nga madaling abusuhon kon ginamadali ro implementasyon.
