KALIBO,Aklan– Sangka 80-anyos nga eaeaki sa Vietnam ro ginasugid nga 61 anyos eon nga owa nagakatueog bangud sa insomnia!
Raya hay ro mangunguma nga si Thai Ngoc nga masobra sa an-um nga dekada eon nga owa it n tueog ag owa naapektuhan kara ro anang ikamayad nga eawas.
Suno sa anang pamilya, amigo ag kaeapitbaeay, owa pa nanda nakita si Ngoc nga nagakatueog.
Nag-umpisa ro ikasarang ni Ngoc nga owa nakakabatyag it duyog kat imaw hay 20-anyos pa eamang.
Nakaangkon imaw it grabeng eagnat ag umpisa kato hay indi eon imaw makatueugan.
Maskin nga mag-inom imaw it sleeping pills, nagtesting it traditional medicine ag aeak, owa imaw gihapon ginaduyog.
Pilang espesyalista eon man idtu ro nag-tanyag it libreng testing ag analysis sa anang baeatian.
Apang nagpamalibad si Ngoc bangud nga para kana, indi eon nana kinahangean nga magpa-check-up sa doktor.
Nasayuran man it sleep medicine specialist nga si Dr. Vikas Wadhwa it Sleep Services Australia ro anang kahimtangan.
Nagtau imaw it opinyon angot kara ag sa anang tan-aw hay nakakatueog si Ngoc apang owa eamang nana raya napan-uhan.
Ginpaathag kara nga ro mga tawong may severe insomnia hay indi eon ma-distinguish ro pagiging tueog sa pagiging bugtaw.
Posibleng nakakadupilok imaw it makadali nga oras at raya hay bastante eon agud nga makaangkon imaw it kabaskog sa bilog nga adlaw.
