KALIBO, Aklan — Ginabuytan eon it kapulisan ro mga ginaturong suspek sa pagpatay sa sangka empleyado it hotel nga nasapwang patay sa binit it baybayon sa Sitio Angol, Barangay Manocmanoc, Boracay ko adlaw it Huwebes.
Namatay sa pambugbog si Jerson Hernandez, 27, tubong Nueva Ecija, sangka bading ag nagatrabaho bilang housekeeper sa Turtle Inn Resort sa isla.
Pamaagi it sangka tipster nga si certain Alex, nakilaea ro mga suspek nga sunud-sunod nga nadakpan sa ginpatigayong operasyon it Malay ag Kalibo Police Station nga sanday Joshua Baladjay, 20, nga naaresto sa anang ginatrabahuan ag si Omar Dublois, 21, nadakpan sa andang baeay, parehong nagatrabaho sa banwa it Kalibo ag mga residente it Lezo, Aklan.
Suno kay PO3 Bobby Abayon it Malay PNP-Boracay Sub-Station nga gin-ako sigon it daywang suspek nga ginkabuligan nandang bugbugon ag gin-eob-eob pa sa tubi ro biktima matapos sandang bastuson kara pamaagi it paghulipak ag pagbuyot sa andang kinatawo samtang nagapaligos sa dagat.
Matapos sigon mahilong hay ginsampit sanda it bading nga magpaligos ag idto eon sigon natabo ro paghulikap kanda.
Nakakulong eon sa makaron ro daywa sa Boracay Sub-Station ag nakataeanang pasakaan it kasong murder.
