KALIBO, Aklan — Ginkumpirma mismo ni Rev. Fr. Cyril Villareal nga sa maabot nga Abril 23 bandang alas-9:00 it agahon sa St. John The Baptist Cathedral pagahiwaton ro anang Episcopal Ordination and installion bilang Obispo it banwa Kalibo.
Raya suno kana ro naging desisyon it Board of Consultors it Diocese of Kalibo sa ginpatigayon nga pueong sa pagpanguna ni Capiz Archbishop Victor Bendico, ro nagatindog makaron nga apostolic administrator it Kalibo, kasunod it pagretiro ni Bishop Jose Corazon Tala-oc.
Pagapangunahan ni Archbishop Bendico ro pag-ordina kabulig bilang mga co-consecrator sanday Bishop Tala-oc ag Romblon Bishop Narciso Abellana.
Ginaeauman nga magatau it pahayag sa seremonya si Manila Archbishop Jose Cardinal Advincula, nga dating arsobispo it Capiz kun sa siin nagserbing vicar general si Bishop-elect Villareal.
Matapos ro ordinasyon hay insigida imaw nga igataeana sa cathedral it diocese , sangka senyales it anang pormal nga pag-umpisa it pagserbisyo sa pag-giya sa masobra sa tunga sa milyon nga katoliko sa probinsiya.
Samtang, nagapati si Rev. Fr. Villareal nga pagbuot it Diyos rason nga hantup sa tagipusuon nana nga ginbaton ro bag-ong misyon nga gintau kana it simbahan.
Aminado ro pari nga ko una hay may pagduha-duha pa ag pagkabaeaka imaw nga nababatyagan nga batunon ro offer bangud sa mabahoe nga responsilidad nga paga atubangon, apang ginatugyan sigon nana sa Diyos ro pag-giya kana sa anang pagserbisyo sa mga sumueunod it Diocese of Kalibo.
Inabot pa suno kana it daywang adlaw antes eubusan nga ginbaton ro offer kana.
Aminado man man imaw nga maskin kan-o hay owa nagsueod sa anang isip nga magdumaea sa sangka diocese bangud nga masadya eon imaw nga nagaserbisyo bilang ordinaryong pari.
Ginpasiguro man ni Bishop-elect Villareal ro pagpabaskog it synodality sa pagdumaea sa diocese ag ro padayun nga paghugpong sa pumueuyu agud nga tingub nga maga-agi sa daean paagto sa Diyos.
Nasayuran nga si Fr. Villareal hay ro ika-limang obispo it Diocese of Kalibo.
Kalibo Bishop Elect Cyril Villareal sa anang pagpahayag.
Madumduman nga ko Enero 24 hay gin-appoint ni Pope Leo XIV si Bishop-elect Villareal bilang obispo it Kalibo, nga nagapabilin nga sede vacante umpisa ko June 2025 matapos batunon it Santo Papa ro pagretiro ni Bishop Tala-oc.
