INTERNATIONAL News — Ginkumpiska it Estados Unidos ro eroplano ni Venezuela President Nicolas Maduro samtang nga naka-park raya sa Dominican Republic.
Suno sa statement ni US Attorney General Merrick Garland, ginhimo raya it Justice Department bangud sa gina-alegar nga iligal nga pagbakae it private aircraft sa balor nga $13 million gamit ro shell company.
Gin-smuggle paguwa it Amerika ro eroplano ko April 2023 pinaagi sa Caribbean para magamit ni Maduro ag ko anang mga cronies sa international travel.
Ro aircraft hay sangka Dassault Falcon 900EX nga kapareho it Venezuela sa Air Force One it Amerika.
Nagtingob it puwersa ro Homeland Security Investigations, Commerce agents, Bureau of Industry and Security; ag US Justice Department sa pagkumpiska sa eroplano nga ginpaeupad paagto sa Florida sa bulig it Dominican Republic.
Ginkaakig raya it Venezuelan government ag gin-akusahan ro US nga sangka “pirata” ag ginapa-grabe ro sitwasyon.
