Sangkaterbang doses it bakuna ro ginasugid nga maga-expire sa maabot nga Hulyo.
Raya hay sa pihak nga ginhambae it National Task Force Against COVID-19 nga daywang porsiyento eamang sa imbentaryo it bakuna ro nakataeanang ma-expire ag maeayo sa ginahambae nga 27 milyon doses.
Mga donasyon sigon raya ukon ro ginbakae it mga lokal nga gobyerno ag pribadong sektor ag owa ginbakae it national government.
Apang kon paga-isipon, kanugon sa gihapon ro mga raya.
Rason nga makaron , imbes nga eubusan nga mauyang, igadonar eon lang it Pilipinas sa ibang nasyon nga nagakinahangean man kara.
Ro Myanmar ag Papua New Guinea ro posibleng mabenepisyuhan it donasyon nga bakuna.
Kun dati hay nakikipag-unahan ro gobyerno sa pagbakae it bakuna, makaron hay medyu ro mga magapabakuna ro ginakueang.
Kapin sa 65,885,048 ro numero it mga indibidwal nga fully vaccinated hasta ko Marso 30, apang kapin sa 12,018,418 pa eamang ro nakabaton it booster shot.
Ok eon sa mga pumueuyu ro primary vaccine ag gina-ayawan eon ro booster.
Agud nga maengganyo ro publiko nga magpa-booster shot ag indi eubusan nga mauyang ro mga bakuna, ginakonsidera it gobyerno nga butangan it an-um nga buean nga expiration ro mga vaccination cards.
Raya hay nagakahueugan nga kon indi magpa-booster sa sueod it an-um nga buean, awtomatikong maga-expired ro vaccination card it sangka indibiduwal.
Mas pang gina engganyo ro publiko nga magpa-booster bangud man sa ginaeauman nga surge it COVID-19 pagkatapos it eleksyon.
Posible sigon nga maging ‘super spreader’ ro eleksyon. Kabay nga indi kita matuead sa ibang kaiping nga nasyon, kun sa siin grabe ro naging surge rason nga nauman ro mga lockdown.
