Kalibo, Aklan-Natapos eon ro kampanya sa Paris Olympics it mga Filipina gymnast nga sanday Levi Ruivivar, Emma Malabuyo, ag Aleah Finnegan. Napas-eawan ro mga raya nga makasueod sa Top 24 it artistics gymnastics nga ginpatigayon sa Bercy Arena.
Suno kay Bombo International Correspondent Mary Den Araneta, naghampang ro tatlo sa Subdivision 3 kon sa siin nag-umpisa sa balance beam. Nakabuoe si Ruivivar it 11.866 points, samtang 11.466 points ro naangkon ni Finnegan ag naka-12.233 points mat-a si Malabuyo. Sa floor exercise hay nakabaton it 12.733 si Finnegan, kapin sa 13.100 ay Malabuyo ag may 12.433 mat-a si Ruivivar.
Samtang sa vault hay may 13.600 points si Ruivviar ag 13.266 si Malabuyo samtang si Finnegan hay naka-13.383 points. Nagtapos ro andang rotation sa uneven bars kon sa siin nakabuoe it puntos nga 12.500 si Malabuyo, samtang may 12.566 si Finnegan ag naka-13.200 mat-a si Ruivivar.
Nagakahueogan raya nga patas sanday Ruivivar ag Malabuyo sa pang 28 ag 29 nga kabilugang puntos nga 51.099 samtang si Finnegan hay una sa pang 33 nga may kabilugang 50.498 points. Mismong ro Top 24 nga atleta eamang ag top 8 sa kada apparatus ro abanse sa Finals nga may unang hasta sa daywang atleta eamang kada nasyon ro pwedeng mag-qualify.
Apang, proud nga ginpakigbahin ni Arante nga nakahimo it kasaysayan ro tatlo bilang mga unang pambato it Pilipinas sa women’s gymnastics sa quadrennial event sa sueod it an-om nga dekada.
