KALIBO, Aklan—Ginkalipay it Federation of Kalibo Tricycle Operators and Drivers Association Inc. ukon FOKTODAI ro pag-apruba it Sangguniang Bayan sa proposisyong pagdugang it sambilog nga pasahero sa mga nagabiyahe nga tricycle sa banwa it Kalibo.
Suno kay FOKTODAI president Johnny Damian nga mabahoe ro maibulig kara sa kapareho nana nga mga driver nga nagatinguha nga makapangita sa tunga it pandemya.
Ro pag-apruba sa nasambit nga proposisyong hay ginbase sigon sa presenteng sitwasyon it probinsya kung siin nakitaan eon it pagnaba sa mga nailistang kaso it COVID-19 ag pagbutang sa mas haeuga nga quarantine status.
Nakataeana eon sigon raya nga i-review it Sangguniang Panlalawigan ag engkaso nga owa man it makitang problema hay igabalik raya sa lokal nga gobyerno para pirmahan ni Mayor Emerson Lachica.
Dugang pa ni Damian nga dapat gihapon nga masunod ro minimum health protocols partikular ro pagbutang it plastic barrier para masigurong eowas ro mga commuter.
Nagaeaum sigon sanda nga madayun eon ro implementasyon kara.
