SPORTS News– Matapos ro kampanya it Gilas Pilipinas Women sa FIBA Asia Cup sa Australia hay magasabak man ro Gilas Pilipinas Youth team sa 2023 FIBA U16 Women’s Asian Championship sa Jordan.
Ro mga miyembro it national youth squad nga sasalang sa torneo umpisa makaron nga Hulyo 10 hasta 16 hay sanday Demicah Jaeriel Arnaldo, Sophia Anne Dominique Canindo, Isabella Rose De Jesus, Ariel Star De La O, Ava Camryn Fajardo, Scarlett Montana Mercado ag Alyssia Rylee Palma.
Kaibahan man koponan sanday Ryan Kelly Nair, Naima Navarro, Ma. Christina Aubrey Lapasaran, Kimi Shannon Lynn Sayson ag Nevaeh Faith Smith.
Si coach Pat Aquino ro magagiya sa Gilas Pilipinas Youth nga tumapos sa ikatlong posisyon sa nakataliwan nga 2022 FIBA U16 Women’s Asian Championship.
Misyon it tropa nga magpanguna sa Division B para ma-promote sa Division A nga nagatanyag it tiket para sa FIBA U16 Women’s Asian Championship sa 2025.
Kaibahan it mga Pinay dribblers sa Pool A ro Hong Kong, Maldives ag ro host nga Jordan samtang una sa Pool B ro Iran, Singapore, Guam ag Malaysia.
Unang makaengkwentro it Gilas Youth ro Hong Kong makaron nga Hulyo 10 kasunod ro Maldives sa Hulyo 11 ag ro Jordan sa Hulyo 12.
Ro top two teams sa kada pool ro magasueod sa semifinal stage samtang mahueog ro iba sa classification phase.
