KALIBO, Aklan — Nakataeana nga magapatawag it pueong ro Department of Environment and Natural Resources ukon DENR-Aklan sa tunga it nagapanag-iya it gina-alegar nga ginakutkot nga bubon ag Barangay Council it Libang Makato.
Raya ro ginpahayag ni Lisa de Guia, focal person it Mines and Geosciences Bureau ukon MGB-Aklan agud nga maresolba eon ro nasambit nga isyu.
Sa makaron suno kana hay owa pa nakapadaea it sabat ro National Museum of the Philippines angot sa andang ginsumite nga report sa ginpatigayon nanda nga inspection may pilang buean eon ro nagtaliwan nga kon sa siin base sa andang initial findings, may nagakatabu nga treasure hunting sa lugar.
Ginpahayag dugang ni de Guia nga nagakutkot sigon it vertical nga deep weel ro nagapanag-iya it eugta para sa anang igatukod nga manukan ag raya hay nahamtang sa nabukid nga portion it lugar.
Samtang, ginpapundo man sigon nanda ro pagkutkot hasta nga owa pa nakabo-oe it nagakaigo nga permit ag clearances ro nagapanag-iya it eugta nga si Mr. Boy Ginoy.
Mabuhay eon sigon nga ginareklamo it mga residente ro ginahimo nga pagkutkot bangud sa pagkabaeaka sa andang seguridad bangud sa gina-alegar nga may nagakatabu nga rock slide sa lugar.
