KALIBO, Aklan — Hugut nga ginapamaeabagan makaron it mga progresibong grupo ro hagna nga nagapaiway sa Barangay ag Sangguniang Kabataan (SK) elections sa masunod nga dag-on.
Suno kay Reyland Vergara it Karapatan-Panay, klaro sa laye nga tatlong dag-on eamang pwedeng magpanerbisyo ro mga lokal nga opisyal sa barangay.
Dapat suno kana nga tan-awon sa raya nga bagay nga may unang mga opisyal nga bukon eon it epektibo kamana man uwa naga-perform it husto sa andang trabaho.
Ro tatlong dag-on nga pagpanerbisyo it mga barangay officials hay bastante eon suno kana agud nga makit-an ro andang mga nahimuan ag kon sanda hay nagakadapat pang ibalik sa pwesto.
Ginpahayag dugang nga nagapati sanda nga ro pagpaiway sa nasambit nga eleksyon hay ginagamit it mga maeagkuang opisyales it gobyerno para eamang sa andang pangkaugalingong interest.
Madumduman nga ginpalig-on sa pangatlo ag pinal nga pagpamati sa Senado ro proposisyon nga nagapaiway sa Barangay ag Sangguniang Kabataan (SK) elections.
Pinaagi sa botong 21 affirmative, zero negative ag zero abstention hay naka-eosot ro Senate Bill No. 1043 para sa postponement it Brgy ag SK elections ag igapatigayon eon lang raya sa December 5, 2022.
Bangud kara hay otomatikong mataw-an it extension ro pagpamuno it mga presenteng opisyales it barangay.
