Maga-invest it todo ro gobyerno para ubrahong sambato sa pinakaeuwas nga nasyon sa bilog nga kalibutan ro Pilipinas.
Suno kay Department of the Interior and Local Government (DILG) Secretary Jonvic Remulla, himuon raya sa masunod nga mga buean ag dag-on.
Kaibahan sigon sa mga ubrahong tikang para maisakatuparan raya hay ro pagpabaskog pa it 911 emergency call system nga ginaeaumang magiging fully operational sa Metro Manila, Cebu ag Davao sa Hulyo.
Plano man it gobyerno nga magbutang it sangka closed-circuit television camera (CCTV) sa kada 1,000 square meters sa bilog nga nasyon ag maga-bakae it mas maabo pang mga patrol vehicles para sa mga police officers para maka-sabat sa 5-minute response time target it Philippine National Police (PNP).
Madumdumang nauna eon nga nareport ro pagpanguna it Pilipinas sa listahan it “least safe country” sa bilog nga kalibutan it HelloSafe Safety Index 2025 it HelloSafe website.
Sa pihak nga insigida man rayang ginbag-o ag gin-buoe ro Pilipinas sa top list it mga bukon euwas nga nasyon. Apang nauna eon nga pinaeagan it Department of Tourism (DOT) ro pag-eakip sa Pilipinas bilang least safe country sa bilog nga kalibutang sa travel safety index.
Kaibahan it ahensiya ro iba pang tourism industry groups ag hotel operators nga nag-kondena sa nasambit nga website nga suno kay Tourism Sec. Christina Frasco hay naka-apekto sa kumpiyansa it mga dumueuong sa nasyon.
