Nag-apela sa gobyerno ro Greenpeace Philippines ag iba pang organisasyon nga pasabton ro MT Terra Nova ag ro mga indibidwal nga konektado kara. Raya hay kasunod sa nadiskubrehan ag nakit-an it Greenpeace Philippines nga kaeaparon it oil spill halin sa nag-eogdan nga oil tanker sa Liway, Bataan ko adlaw it Huwebes, Hulyo 25.
Suno sa environmental group, umabot eon ro halit kara hasta sa Hagonoy, Bulacan. Samtang, ginkumpirma man it mga opisyal it Brgy. Isla Tibaguin ro nasambit nga oil spill matapos makit-an ro mga nagkalhit nga langis it mga nag-eayag nga mangingisda. Ginakabaeak-an nga mas pang magakalhit ro langis sa mga masunod nga inadlaw ag posible pa sigon nga umabot sa Metro Manila.
Samtang sa pihak nga parte, nakakita ro Philippine Coast Guard (PCG) it leaks sa nag-eogdang nga motor tanker (MTKR) Jason Bradley. Ro 39-meter nga motor tanker hay naeogdang sa kaeawran nga parte it Barangay Cabcaben, Mariveles, Bataan. May karga raya it inde masayuran nga kaabuon it diesel.
Nagapabilin raya sa idaeom it 9 metros sa kaeayuon nga 600 yarda halin sa pantalan. Gintakpan eon it mga divers it Coast Guard ro leak ag nagahimo eon sanda it pamaagi para mabuoe ro karga kara nga diesel.
