KALIBO, Aklan—Bukon it pabor ro sangka grupo it riders sa Aklan sa ginaduso it gobyerno nga butangan it barrier sa tunga it driver ag backrider agud nga maging libre sa angkas.
Suno kay Kenneth Ang, mas makapamayad kon maghelmet eon lang ag magsuksok it face mask agud nga eubusang makalikaw sa virus kaysa magbutang it barrier nga posible pang tunaan it aksidente.
Ginpaathag ni Ang nga protektado eon ro bilog nga uyahon sa helmet ag facemask pa eamang rason nga inde eon kinahang-ean ro barrier bangud kon sa mga scooter ukon hooper gina-install hay inde eon mabuksan kara ro u-box ag may posibilidad pa nga mahukas kon hipalid it hangin partikular kon bukon it malig-on ro pagka-install.
Mabahoe ro risgo it aksidente sa ginaproponer nga barrier it gobyerno bangud kon mag-asawa ukon mag live-in partner eamang ro ginapasugtan hay inde eon nanda kinahang-ean ro anu pa man nga barrier sa tunga nandang daywa.
Madumduman nga ginapasugtan eon ro angkas sa motorsiklo para sa mga magpartner apang mag-eowas sa mandatory nga pagsuksok it facemask ag helmet, kinahang-ean nga may harang sa tunga it driver ag backrider.
Raya hay sangka prototype nga barrier nga ginproponer it gobyerno it Bohol.
Kinahang-ean man nga magpakita it dokumento ro magtimbang nga parte para pamatud-an nga magkabaeay sanda nga daywa.
