KALIBO, Aklan —Ginhinyo it Boracay Foundation Incorporated (BFI), grupo it mga negosyante sa isla nga paeawigon hasta it Setyembre 30 ro operasyon it One Stop Shop nga magatapos eon sa Agosto 25 agud madaling maproseso ro mga requirements sa uman nga pagbukas it isla.
Sa ginpaguwa nga pahayag, gusto sigon nandang mataw-an pa it bastanteng tyempo it Inter-Agency Task Force agud maka-comply sa mga requirements bilang pagsunod sa environmental laws ag regulasyon.
Ro mga naka-comply eamang sigon nga business owners ro makadungan sa reopening it tourist destination sa Oktubre 26.
Ginpahayag pa it BFI nga mabudlayan ro mga negosyante sa isla kon napas-eawang makaeagas sa deadline bangud kinahang-ean pa nandang magpadueong sa Iloilo sa regional offices it Department of Environment and Natural Resources (DENR), Department of Tourism (DOT) ag Department of Interior and Local Government (DILG) para sa mga nagakaigong permits.
Nauna eon kara nga gin-aprubahan it Sangguniang Bayan it Malay ro sangka resolusyon ko Agosto 14 nga nagaapela kay Environment Secretary Roy Cimatu nga mapaeawig ro operasyon it one-stop-shop.
